日子耐咗，相信好多渣寶馬嘅車主都會發現波棍頭銀色部份出現花痕，特別係戴戒指用車嘅車主，就會更加容易花。以下係重新上油嘅工序，大家仲可以選擇自己鍾意嘅顏色。不過如果要拔出原廠波棍頭，要先落"D"波，如果冇另一支波棍頭，就無法去返"P"波，咁車匙就要暫時插住(有 Keyless Go 除外)。但係留喺"P"波係咪一定唔可以拔出波棍頭？咁我就未試過，網上所有教學都係要落"D"波或者"N"波先。
工具：
1. 幼沙紙
2. 噴漆 (車用品舖頭買到，HKD100 左右)
3. 亮光油
工序：
1. 首先用膠紙將不用上油嘅地方包好。
2.用幼沙紙將原本銀色亮光部份磨至啞光。
3. 開始噴顏色，基本上噴到均匀就可以。
4. 噴亮光油，呢個步驟好緊要。要噴到好似有層透明膠膜咁，起碼要比顏色油噴多三四倍。
5. 最後要放喺乾爽嘅地方三四日，有太陽曬住就最好。
