後坐手枕碳纖維包膜＋更換拉簾蓋

後坐手枕翻新後效果不錯

拉簾蓋日後老化最後爛成一塊二塊，首先買一個全新拉簾蓋更換，淘寶貨都要 HK$400。到貨前先將整個手枕拆除，拆除後再清潔乾淨。

清潔好後就順便包碳纖維膜，表面雖然有好輕微摺痕/氣泡，但驟眼看是還可以接受，不太差。

Akrapovic Carbon Fiber Tip

89mm 碳纖維排氣喉改裝

首先喺淘寶搵一款碳纖維罩，尺寸內徑係86mm，而原廠喉咀直徑係80mm。我先用3M耐高溫雙面膠紙喺碳纖維內圍逐層逐層疊成3mm高，每層大慨1mm厚左右，貼8個位置，分別係前四塊，後四塊，上下左右成十字架形，每個位置疊3層剛好3mm高。

每塊雙面膠紙盡量同一大小為 1.8cmX1.5cm。貼好後量度一下內徑，碳纖維罩未必係一個正圓，最長直徑可以去到87-88mm，如果迫得唔緊當然有機會黐唔實。最後加多一層(1.8cmX2cm)雙面膠紙，多出嚟0.5cm就造成一個斜邊，等套入去原廠喉咀時可以順啲。

先清潔好原廠喉咀，用皂水噴滿喉咀，目的係要令雙面膠紙唔好即時黐實，方便定位。由於每邊4mm填充太厚， 稍為要耐性先迫到入去。襯皂水未乾時要馬上定好位置。先整好左邊死氣喉，跟住同一程序造埋右邊。

完成後再等皂水乾透就大功告成。

藍牙4.2接收AUX輸出播放器

喺淘寶前前後後買過三款藍牙車載。

第一次係FM輸出，點煙插攞電，雖然安裝超簡單，完全冇拖線嘅煩惱，但因為始終用FM頻度，音質麻麻。當音量較大時會聽到"唦唦" 聲，姐係收音機收得唔係好清咁嘅聲。

第二次係FM/AUX輸出，又係點煙插攞電。用AUX輸出音質明顯比FM好好多，所以一直用咗幾個月都冇投訴。唯一問題係插住舊嘢整體唔美觀，而我架車(E92)需要長期打開散銀蓋。

呢次我選擇咗呢款只可以AUX輸出，麻煩在要拉線，不過只係麻煩一次，只要用心走靚啲線，安裝後比第二次更加美觀。安裝位置又可以自定，而音質同第二次差唔多。

由於軚盤左邊係 Engine Start Button，所以我選擇安裝喺軚盤右邊邊。跟機有個風口夾，你亦可以插喺出風口，但我唔鍾意襟掣時旭下旭下，所以我選擇黐實佢。你唔需要擔心黐得唔正，因為底部係磁石座，姐係你可以成個拎出嚟，亦可以自由轉動。

呢個位有少少唔方便，就係水潑掣會擋住，但用慣咗又OK。而安裝喺呢個位講電話個 mic 距離司機更近，應該比第二次講電話時對方聽得更加清晰。

用咗一個星期，我覺得好滿意！

原廠迫力卡鉗金色噴油

GTR Brembo 古銅金色，如果日後有花，可以用 Humbrol #54 補油。

陰暗光線下睇落去似古銅色，而且比較偏橙色 。

尾卡鉗比較細隻，所以連迫力皮都噴埋。

ZIMMERMANN cross drilled rotor + TEXTAR® brake pads

Otto-Zimmermann 開窿剎車碟，德國製造

頭碟 348x30mm，跟原廠尺寸相同，用回原廠迫力卡鉗。由於碟內通風排列是直紋，所以左右碟開窿紋路可以相反而不影響剎車及散熱性能。

註：如碟內的通風排列是斜紋，左右碟便需要有轉向之分

尾碟 336x22mm，4隻碟都有防銹塗層，不需要磨掉可直接安裝，安裝後剎車時會把接觸面塗層磨走。

註：剛安裝後剎車要預先保持前車一段距離，防銹塗層未完全磨走前剎車性能會比較弱

BMW 2012 E92 Pre-LCI Smoke Tail Light

DEPO 台灣製造，包裝內已附解碼器，Plug &  Play 就可以。不過安裝後冇原廠燈咁 fit 位，如果要求高嘅車主需要花時間左右調教取得平衡。注意螺絲要上緊，安裝好後最好用水喉向尾玻璃灌水，確保水冇喺左邊尾燈滲入車箱，否則會導致音響短路燒 amplifier 。

BMW E92 smoke fender side marker LED light

eBay 燻黑款黃光 LED 燈，有白光揀，但避免政府驗車麻煩，所以選擇了黃燈。

原廠燈罩拆除非常簡單，只要向車尾方向一推，便輕易將燈罩拉出來。

未裝前看上去以為很黑，但裝好後感覺只是比原廠黑少少，但感覺不錯。

我覺得黃燈不錯，指揮燈亮起時跟車頭車尾指揮燈黃光對應。